Angscht a Schrecken am Summerlach 2015

Ech hunn schonn eng Kéier op dëser Plaz gesot, datt Summerlach keng Plaz oder Zäit ass, mä een Zoustand. Een, dee vun de Medie méi oder manner bewosst erbäigefouert gëtt. Et ginn zu all Joereszäite Lächer am Bueden, déi sech duerch geologesch oder pedologesch Begebenheeten opdinn, op Englesch nennt een dat “sinkhole”. Komescherweis gëtt bal nëmmen am Summer doriwwer bericht. An och soss ginn da gäre speziell “Summer-Serien” agefouert, wou zum Beispill déi klengsten Uertschaften aus dem Land virgestallt oder méi oder manner onbedeitend Politiker_inne mat däämlechen “x oder y”-Froe genervt ginn.

Dat ass alles näischt neies, a wahrscheinlech läit et och bëssi um Konsumverhale vum Publik an dem Onwëlle vun de sougenannten “Herausgeber” vun de Medien, fir méi a besser bezuelte Leit anzestellen, déi besser recherchéierte Conentu liwweren. Et ass zimlech einfach, sech doriwwer opzereegen, mä méi schwiereg, et besser ze maachen. An engem Fräiwëllegenbetrieb wéi dem ARA bleift engem net vill méi, wéi op mannst e puer Denkustéiss ze ginn. Read More

Angscht a Schrecke mat deenen “dommen” Rietsen

Säit Wochen ass a villen europäeschen Länner d’Thema vun den Asylsichenden op der Daagesuerdnung. An Italien, Spuenien a Griicheland kommen bal all Dag honnerte vu Leit un, déi virun Krich an Terror flüchten an dobäi keen aneren Auswee gesinn, wéi sech op déi doudgeféierlech Rees iwwert Mëttelmier ze maachen. Zu Calais a Frankräich versichen se, duerch den Tunnel an England ze gelaangen, an Éisterräich ass d’Lager zu Traiskirchen esou iwwerfëllt, datt Amnesty International eng Enquete mécht an an Däitschland brennt well all Dag een Asylheem.

Facebook ass voll mat friemefeindlechen Kommentaren. Rietser, Neonazien an selwerernannt “besuergt Bierger” maachen on- an offline mobil géint Mënschen, déi virun Biergerkrich an Terror geflücht sinn an ëm Asyl usichen. Et ass fir ze katzen. Et ass schlëmm, dat deet wéi ze gesinn an et ass nëmmen méi wéi richteg, datt een net nëmmen déi Leit a Schutz hëllt, déi dofir an Europa komm sinn, mä sech och deenen entgéintstellt, déi näischt aneres wéi Haass, Rassismus an eng komesch Zort vu Näid séinen wëllen. Esou kann ech och just all deene Leit applaudéieren, déi dëse Weekend zu Tréier géint d’NPD demonstréiere gaange sinn, déi zu ganzer 25 eng Demonstratioun ënnert dem Motto “Deutschland den Deutschen” duerchféiere wollten.

Schonns hiren Opruff war an d’Box gaangen. An engem Video, wou 4 Hären ze gesinn waren, déi mat Fakelen hantéiert an wéineg gekonnt hier rassistesch Parolen an d’Kamera gebillt hunn, hate se probéiert fir hir Demonstratioun ze mobiliséieren. De Video ass viral gaangen: Mä net aus dem uviséierten Ziel, mä well een esou peinlech war. Neonazien, déi sech lächerlech maachen, dat verbreed sech natierlech séier.

An gären ass dann dovunner riets, datt déi Hären net immens intelligent wieren. An déi selwecht Kerb huet och den Farin Urlaub vun der däitscher “Pop”grupp “die Ärtze” an engem Interview geschlo: Esou laang wéi et nach Leit géif ginn, déi näischt kéinten, näischt geleescht hätten an näischt wéissten an dofir op hiert Land stolz misste sinn, esou laang géif et nach Alldagsrassismus ginn.

Ech hu bëssi meng Problemer mat där Idee, datt riets “domm” ass. Net nëmmen, well dat oft sou en “Unterschichten-Bashing” ass. Mä och, well et vill “gescheit”, studéiert Leit ginn, déi riets Usiichten hunn. An vläit ass den (verbalen!) Brachialrassismus vun NPD-Neonazien wéineger geféierlech wéi een vun der “gesellschaftlecher Mëtt”, déi bei brennenden Asylheemer vun “Asylkritiker” amplaz vun Terroriste schwätzt.

Rassismus ass keen Problem, deen eng bestëmmt Schicht oder Klass vun eiser Gesellschaft betrëfft. Am Géigendeel: Mir wuessen all an engem rassisteschen System op. Vill rassistesch oder friemefeindlech Denkmustern hale mir also vir normal, well mir et esou geléiert hunn. Et ass awer keen groussen Effort, fir déi grondleeënd Wourecht, datt all Mënsch déi selwecht Rechter huet, ze erkennen. An d’Recht op Asyl ass een vun deene Rechter. Ween mengt, dat wier just een Problem vun der sougenannter Ënnerschicht, deen läit falsch: Enorm vill Rietsextremer kommen aus dem akademeschen Milieu an vernetzen sech och do.

Ech denken datt all Mënsch zur Mënschlechkeet fäheg ass, egal wéi “domm” oder gescheit en ass. Et hëlleft näischt, sech selwer besser ze fillen, well een vill Bildung huet an ze mengen, et wier een doduerch immun fir Rassismus. Et hëlleft iwwregens och wéineg, de Mantra “ech si keen Rassist” stänneg opzesoen, well doduerch ginn rassistesch oder auslännerfeindlech Handlungen net manner rassistesch. Wichteg wier et, ze probéieren, Weeër ze fannen wéi een progressiv oder lénk Positiounen zu Themen wéi Asyl kann erklären, esou datt jiddereen se kann verstoen.

Een wéideren interesanten Artikel iwwert déi ékonomesch Fakteuren vun Rasismus an “Ënnerschicht” fannt dir héi.

Foto mit freundlicher Genehmigung von lavendelblueten.tumblr.com

Angscht a Schrecke mat e bësse Kräid

Nationalfeierdag war schonn ëfters Thema op dëser Platz. Engt Joer hunn ech d’Leit all gefoppt, well ech einfach d’Geschicht vum Virjoer erzielt hunn, well am Fong all Nationalfeierdag genee d’selwecht ass. Dir kënnt dat jo gären an der Episod Nummer 31 nolauschteren. Mä dësen Nationalfeierdag war e bëssi anescht wéi soss. Dëst Joer hu mir nämlech wierklech de Kär vu Lëtzebuerg gefeiert.

Et puer Jonker hunn sech geduecht, den 23. Juni wier am Fong den idealen Dag fir iwwert dat komescht Konzept vun der Natioun nozedenken. Si hunn e puer Géigesätz wéi „Monarchie – Republik“ oder „Arméi – Kachkéis“ gesammelt an d’Nationalhymn ëmgedicht. Dat wollten si dunn op de Buedem virun der Philharmonie molen. Mat Kräid. Fir déi ënnert iech, déi dat verpasst haten: Mëttlerweil ass d’Wëssenschaft esou wäit, datt een Kräid an der Dous ka kafen. Dat gesäit dann baal esou aus wéi Spraydouse fir Graffiten ze molen.

Eis Jonker hunn sech also mat der Kräid an der Dous op de Kierchbierg gemaach. An wat dunn geschitt ass, hutt dir sécher matkritt. Et stoung nämlech am Policebulletin. An wat am Policebulletin steet, zielen se kuerz drop um RTL, et steet an all Zeitung an den Essentiel probéiert eng méiglechst sexualiséiert Headline domadder ze bastelen. Kaum haten déi Jonk Aktiounskënschtler*innen e puer Wierder mat Kräid aus der Dous op de Buedem gesprutzt, koum d’Police. Net een Auto, mä der direkt fennef. Mir erënneren eis: Dat lei war an der Nuecht vum 22. op 23. Juni, wou meechtens dach e bëssi eppes lass ass an der Stad. Read More

Angscht a Schrecke mat de léiwe Lëtzebuerger*innen

„Mir hunn gewielt .. an dass lo gutt. Wa mir an Ausland a Vakanz ginn passen mir eis zumools sprochlech gesinn un, a dat ass hei an eisem letzebuergeschen Ländchen e grousse Problem eis Sprooch net méi kennen iwwerrall ze schwätzen.“

„An hirem Land kréie mir mol keen Pond Botter op Letzenuergesch. Mier aktzeptéiren Sie hei an empfänken Sie an 4 Sproochen an et geet nach net duer!“

„wiesou muss een sech als rassist vernennen loossen well verschidden auslänner sech net wëllen intergreieren.. mol sproch net wëllen leieren an leiwer hir nationaliteit behallen..“

„ganz genau! Dat war nix géint regierung, nix mat net informéiert etc mais ganz einfach d’Leit hunn es saat sech hei doheem mussen unzepassen! All mensch ass wëllkomm, mais integreier dech, leier letz. ,huel eis Nationaliteit un an schonn kannste matbestemmen/wielen.“

„Et geet héich Zäit dat Lëtzebuerg rëm Lëtzebuerg gëtt. Sin ech rassist? Nee, sécher net. Me a kengem aneren Land mussen Bierger sech un d’Auslänner sou upassen wei mir dat hei Dag fir Dag man“

„A wann ech elo als Rassist bezéechent ginn, dann sinn ech houfreg dorop. Dat ass nach 100x besser ewéi dat aktuellt lénkt Gesabbels“

„mir mussen eist land beschützen dass den weouscht net och nach hei hinner kennt, an eist schéint letzebuerg zersteiert“

„go fuck mat der scheiss regierung an immigranten an jo leck mech sieg“

„dei drei froen woren super neeeeee :) déi 4 fro misst och drop sen elo ass et ze spéit fir homosexueler 4x nee do huet den herrrr bettelen gewonen“

„mir haten grad déi ennerhalung hei ma wann awunnerwahlrecht duerch geiw kommen da kommen grenzgäner as soen mir wëllen och mat stemmen mir schaffen hei an bezuhlen steieren dann kennt den an den ma dann mir huerno soen mir mol en junguslav als minister do setzen wau sett ech si auslänner an ech regieren letzebourg nee nee net mat mir ech hu mir grad en buch gemad iwwer dat referdum dingsbums do wat hei offleeft das nee soet als rassist durr gestahlt ginn asw“

„Nee mir halen net ob den Härr X. Bettel a seng aner Leit wollten Eist Land an eis Sproch verschenken“

„dei solle freu sinn iwar habt hey kennen ze sinn d’auslener hurlen eis arbeschplazen wesch déi kréien schon méi wei mir letzebuer! Et geet jo schonns dur dassen se an eist land kommen an dann nach ze domm an ze liedarech sinn eis sproch ze leiaren dat ass eng freschet!“

„jo ganz genau dat wat da vill net verstinn mer sinn keng rassisten déi mécht ginn dozou mat dennen emstenn wou hei am land sinn well se eben alles kréien wat se wëllen an mer bleiwen op der steck“

„ech si keen rassist mee wei kann et sinn dass et verschiddenen auslänner besser geet wei eis selwer an eisem eegenen land??????“

„genau dursch esou leit weis du geet een zum rassist. Dom sablen a sprudelen. Déi leit déi am gruew konnten schaffen waren a sinn dankbar dovier dat letebouerger si dat maachen gelooss hunn. Awer ech si mer sécher dats du ni an engem gruew sungs wann s du iwerhabt schon mol geschafft hues awer vum domme lëtzebuerger senge steieren sech sozial ennersetzen loossen oder kannergeld vum dommen lëtzebuerger an se kasseieren do kanns de wuel matschwätzen“

„net all jo-wieler ass e landesverräter … mais all landesverräter wielt jo!“

Dat, wat dir elo héieren hutt, ware Commentairen op sozialen Netzwierker an op Newssiten. Dat sinn natierlech alles Eenzelfäll, net an iergendenger Form repräsentativ, Xenophobie ass grondsätzlech kee Problem zu Lëtzebuerg, Lëtzebuerger*innen géifen ni eng Entscheedung treffen, déi géint Auslänner geet, do sinn ech mer zu 20% sécher!

Photo: cc-by dierk schaefer

Angscht a Schrecken nom Referendum

Wéi ech Enn 2014 entschloss hunn, aus dëser Rubrik eng Zort politesche Kommentar ze maachen, wou ech, ëmmer wann et opportun erschéngt, d’Lag vum Land analyséieren an d’Politik duerch de Kaba ze zéien, hunn ech mir geduecht, dat géing witzeg ginn. An ech géing net méi an all Episod eppes vu mengen zwee ale Bekannten Angscht a Schrecken zielen.

Ma, si sinn zeréck. Dir kënnt iech sécher denke wisou, wann dir déi läscht Méint net hannert engem Stee gelieft hutt. 80,87 % vun de wahlberechtegte Lëtzebuerger_innen sinn géint d’Wahlrecht ab 16, 78,02 % géint d’Auslänner_innenwahlrecht an 69,93% wollten och näischt vun enger Mandatsbegrenzung fir Regierungsmembren wëssen.

Wa mir lo bedenken, datt déi Prozentsätz net géifen duer goen, fir d’Majoritéit an der Bevëlkerung ze stellen, da kënne mer eis kuerz besser fillen, mä et ännert näischt um Resultat. An natierlech ass d’Resultat och zu engem Deel Schold vun der schlechter Organisatioun, der peinlecher Campagne, der Opklärung, déi ni statt fonnt huet, dem Onmut géint déi aktuell Regierung. Read More